बिक्दैछ नेपाली टिमुरको तेल फ्रान्समा !!

शारदा नगरपालिका–१५ सल्यानमा ३ वर्षदेखि सञ्चालनमा आएको माँ लक्ष्मी हर्बल उद्योगले उत्पादन गर्दै आएको टिमुरको तेलको माग स्वदेशसँगै विदेशमा पनि बढ्न थालेको छ । गएको वर्ष ६०० किलो टिमुरको तेल प्रशोधन गरिएकामा यस वर्ष भने तेलको माग बढेपछि झण्डै एक हजार १०० किलोसम्म तेल प्रशोधन गर्ने योजनामा रहेको छ ।

गत वर्ष मात्र प्रतिकिलो १० हजारदेखि १३ हजारसम्मका दरले टिमुरको तेल काठमाडौँ पठाएको उद्योग सञ्चालक हरिप्रसाद न्यौपानेले जानकारी दिए । ‘गएको वर्षभन्दा यस वर्ष टिमुरको तेलको मूल्य पनि बढेको छ, यस वर्ष टिमुरको तेल प्रतिकिलो रु १७ हजारका दरले ४०० किलो काठमाडौँ पठाइसकेका छौँ।

‘उद्योग शुरु गर्दा आम्दानी गर्न सकिँदैन की भन्ने चिन्ता भए पनि विगत तीन वर्षमा राम्रो आम्दानी भएको र अहिले जिल्लाभित्रका टिमुर उत्पादन हुने क्षेत्रबाट टिमुर सङ्कलन गरी प्रशोधन गरिरहेका छौँ, उद्योगलाई धान्न सक्ने टिमुरको उत्पादन जिल्लामै हुने भएकाले पनि सजिलो भएको छ’, उनले भने । उक्त उद्योगमा सबैभन्दा बढी छत्रेश्वरी गाउँपालिकाबाट टिमुर आउने गरेको छ ।

उद्योग सञ्चालन गर्न जिल्ला वन कार्यालयले आर्थिक सहयोगका साथै टिमुर ग्रेडिङ गर्ने उपकरण उपलब्ध गराएको, प्रधानमन्त्री कृषि कार्यक्रम परियोजनाले मसला उद्योगका लागि सहयोग गरेको र घरेलु व्यवसाय सञ्चालन गर्न सबैबाट सहयोग पाइएकाले काममा सहज भएको उनले बताए । एक क्विन्टल टिमुरबाट ४ किलो तेल उत्पादन हुने न्यौपानेको भनाइ थियो ।

यहाँ उत्पादन गरिएको टिमुरको तेल काठमाडौँमा व्यापारीसम्म पठाउने गरिएको र व्यापारीले फ्रान्सलगायतका विभिन्न देशमा तेल पठाउने गरेको अर्का उद्योग सञ्चालक तथा सल्यान उद्योग वाणिज्य संघका अध्यक्ष वीरबहादुर चलाउनेले बताए । ‘प्रशोधित टिमुर र टिमुरको तेल हामीले चौधरी ग्रुपलाई बेच्ने गरेका छौँ, चौधरी ग्रुपले नै तेल विदेश पैठारी गर्ने र आफूले समेत उपयोग गर्ने गरेको छ’, अध्यक्ष चलाउनेले भने ।

सल्यानका वनगाड कुपिण्डे नगरपालिकाको ९ र १२ छत्रेश्वरी गाउँपालिकाको १, २ र ४ र बागचौर नगरपालिकाको ७, ८ र १२ वडामा व्यावसायिक रुपमा टिमुर उत्पादन भइरहेको छ ।टिमुर फ्रान्स जान थालेपछि सल्यानका किसानले बजार मूल्य राम्रो पाउन थालेपछि टिमुर खेती गर्न थालेका बन्गाड कुपिण्डे नगरपालिका–८ सेराका वीरबहादुर बुढाथोकीले गत वर्ष मात्रै १ लाख ५० हजार बढीको टिमुर बिक्री गरेको बताए । कुपिन्डेकै झुपकली खडकाले यस वर्ष टिम्मुरबाट पाँच लाख आम्दानी भएको बताइन् । टिमुरले मूल्य पाउन थालेपछि परिवार पाल्नसमेत सहज भएको उनको भनाइ छ । ‘मेरो जग्गामा अहिले सय बढी टिमुरका बिरुवा छन्,’ उनले भनिन्, ‘अहिले व्यावसायिक रूपमा मैले टिमुर खेती गर्दै आएकी छु ।’

भिरालो तथा बाँझो जग्गामा व्यावसायिक टिमुर खेती गर्न सुरु गरेका छन् । टिमुर खेतीबाट आम्दानी पनि राम्रो हुने र बजार पनि राम्रो पाउन थालेपछि यहाँका किसान टिमुर खेतीतर्फ आकर्षित भएका हुन् ।यस वर्ष कुपिन्डे, निगालचुला, माँझकाडा लगायतका क्षेत्रबाट मात्रै पाँच करोडभन्दा बढीको टिमुर निकासी भएको उच्च मूल्य कृषिवस्तु विकास आयोजनाका टिमुरविज्ञ गिरिधर अमात्यले बताए । उनका अनुसार हिमालयन बायोट्रेड लिमिटेडको सहजीकरणमा फ्रान्सको मनिफिल्स कम्पनीले टिमुर लिइरहेको छ । आयोजनाले किसानलाई टिमुर टिप्ने पन्जालगायत विभिन्न उपकरण सहयोग गर्दै आएको छ ।